Skandapurāṇa Adhyāya 10

E-text generated on February 22, 2017 from the original TeX files of: Adriaensen, R., H.T. Bakker and H. Isaacson, eds. The Skandapurāṇa. Vol. I. Adhyāyas 1-25. Critically Edited with Prolegomena and English Synopsis. Groningen: Egbert Forsten, 1998.

SP0100010: sanatkumāra uvāca|
SP0100011: sā devī tryambakaproktā tatāpa suciraṃ tapaḥ|
SP0100012: nirāhārā kadācicca ekaparṇāśanā punaḥ|
SP0100013: vāyvāhārā punaścāpi abbhakṣā bhūya eva ca|| 1||
SP0100021: tāṃ tapaścaraṇe yuktāṃ brahmā jñātvātibhāsvarām|
SP0100022: uvāca brūhi tuṣṭo 'smi devi kiṃ karavāṇi te|| 2||
SP0100031: sābravīt tryambakaṃ devaṃ patiṃ prāpyenduvarcasam|
SP0100032: vicareyaṃ sukhaṃ deva sarvaAṃl lokānnamastava|| 3||
SP0100040: brahmovāca|
SP0100041: na hi yena śarīreṇa kriyate paramaṃ tapaḥ|
SP0100042: tenaiva parameśo 'sau patiḥ śambhuravāpyate|| 4||
SP0100051: tasmāddhi yogādbhavatī dakṣasyeha prajāpateḥ|
SP0100052: jāyasva duhitā bhūtvā patiṃ rudramavāpsyasi|| 5||
SP0100061: tataḥ sā tadvacaḥ śrutvā yogāddevī manasvinī|
SP0100062: dakṣasya duhitā jajñe satī nāmātiyoginī|| 6||
SP0100071: tāṃ dakṣastryambakāyaiva dadau bhāryāmaninditām|
SP0100072: brahmaṇo vacanādyasyāṃ mānasānasṛjatsutān|| 7||
SP0100081: ātmatulyabalāndīptāñjarāmaraṇavarjitān|
SP0100082: anekāni sahasrāṇi rudrāṇāmamitaujasām|| 8||
SP0100091: tāndṛṣṭvā sṛjyamānāṃśca brahmā taṃ pratyaṣedhayat|
SP0100092: mā srākṣīrdevadeveśa prajā mṛtyuvivarjitāḥ|| 9||
SP0100101: anyāḥ sṛjasva bhadraṃ te prajā mṛtyusamanvitāḥ|
SP0100102: tena coktaṃ sthito 'smīti sthāṇustena tataḥ smṛtaḥ|| 10||
SP0100110: deva uvāca|
SP0100111: na srakṣye mṛtyusaṃyuktāḥ prajā brahmankathaṃcana|
SP0100112: sthito 'smi vacanātte 'dya vaktavyo nāsmi te punaḥ|| 11||
SP0100121: ye tvime mānasāḥ sṛṣṭā mahātmāno mahābalāḥ|
SP0100122: cariṣyanti mayā sārdhaṃ sarva ete hi yājñikāḥ|| 12||
SP0100130: sanatkumāra uvāca|
SP0100131: atha kāle gate vyāsa sa dakṣaḥ śāpakāraṇāt|
SP0100132: anyānāhūya jāmātṝnsadārānarcayadgṛhe|| 13||
SP0100141: satīṃ saha tryambakena nājuhāva ruṣānvitaḥ|
SP0100142: satī jñātvā tu tatsarvaṃ gatvā pitaramabravīt|| 14||
SP0100151: ahaṃ jyeṣṭhā variṣṭhā ca jāmātrā saha suvrata|
SP0100152: māṃ hitvā nārhase hyetāḥ saha bhartṛbhirarcitum|| 15||
SP0100161: krodhenātha samāviṣṭaḥ sa krodhopahatendriyaḥ|
SP0100162: nirīkṣya prābravīddakṣaścakṣuṣā nirdahanniva|| 16||
SP0100171: māmetāḥ sati sasnehāḥ pūjayanti sabhartṛkāḥ|
SP0100172: na tvaṃ tathā pūjayase saha bhartrā mahāvrate|| 17||
SP0100181: gṛhāṃśca me sapatnīkāḥ praviśanti tapodhanāḥ|
SP0100182: śreṣṭhāṃstasmātsadā manye tatastānarcayāmyaham|| 18||
SP0100191: tasmādyatte karomyadya śubhaṃ vā yadi vāśubham|
SP0100192: pūjāṃ gṛhāṇa tāṃ putri gaccha vā yatra rocate|| 19||
SP0100200: sanatkumāra uvāca|
SP0100201: tataḥ sā krodhadīptāsyā na jagrāhātikopitā|
SP0100202: pūjāmasaṃmatāṃ hīnāmidaṃ covāca taṃ śubhā|| 20||
SP0100211: yasmādasaṃmatāmetāṃ pūjāṃ tvaṃ kuruṣe mayi|
SP0100212: ślāghyāṃ caivāpyaduṣṭāṃ ca śreṣṭhāṃ māṃ garhase pitaḥ|| 21||
SP0100221: tasmādimaṃ svakaṃ dehaṃ tyajāmyeṣā tavātmajā|
SP0100222: asatkṛtāyāḥ kiṃ me 'dya jīvitenāśubhena ha|| 22||
SP0100230: sanatkumāra uvāca|
SP0100231: tataḥ kṛtvā namaskāraṃ manasā tryambakāya ha|
SP0100232: uvācedaṃ susaṃrabdhā vacanaṃ vacanāraṇiḥ|| 23||
SP0100241: yatrāhamupapadyeyaṃ punardehe svayecchayā|
SP0100242: evaṃ tatrāpyasaṃmūḍhā sambhūtā dhārmikā satī|
SP0100243: gaccheyaṃ dharmapatnītvaṃ tryambakasyaiva dhīmataḥ|| 24||
SP0100251: tataḥ sā dhāraṇāṃ kṛtvā āgneyīṃ sahasā satī|
SP0100252: dadāha vai svakaṃ dehaṃ svasamutthena vahninā|| 25||
SP0100261: tāṃ jñātvā tryambako devīṃ tathābhūtāṃ mahāyaśāḥ|
SP0100262: uvāca dakṣaṃ saṃgamya idaṃ vacanakovidaḥ|| 26||
SP0100271: yasmātte ninditaścāhaṃ praśastāścetare pṛthak|
SP0100272: jāmātaraḥ sapatnīkāstasmādvaivasvate 'ntare|
SP0100273: utpatsyante punaryajñe tava jāmātarastvime|| 27||
SP0100281: tvaṃ caiva mama śāpena kṣatriyo bhavitā nṛpaḥ|
SP0100282: pracetasāṃ sutaścaiva kanyāyāṃ śākhināṃ punaḥ|
SP0100283: dharmavighnaṃ ca te tatra kariṣye krūrakarmaṇaḥ|| 28||
SP0100290: sanatkumāra uvāca|
SP0100291: tamuvāca tadā dakṣo dūyatā hṛdayena vai|
SP0100292: mayā yadi sutā svā vai proktā tyaktāpi vā punaḥ|
SP0100293: kiṃ tavātra kṛtaṃ deva ahaṃ tasyāḥ prabhuḥ sadā|| 29||
SP0100301: yasmāttvaṃ māmabhyaśapastasmāttvamapi śaṃkara|
SP0100302: bhūrloke vatsyase nityaṃ na svarloke kadācana|| 30||
SP0100311: bhāgaṃ ca tava yajñeṣu dattvā sarve dvijātayaḥ|
SP0100312: apaḥ sprakṣyanti sarvatra mahādeva mahādyute|| 31||
SP0100320: sanatkumāra uvāca|
SP0100321: tataḥ sa devaḥ prahasaṃstamuvāca trilocanaḥ|
SP0100322: sarveṣāmeva lokānāṃ mūlaṃ bhūrloka ucyate|| 32||
SP0100331: tamahaṃ dhārayāmyeko lokānāṃ hitakāmyayā|
SP0100332: bhūrloke hi dhṛte lokāḥ sarve tiṣṭhanti śāśvatāḥ|
SP0100333: tasmāttiṣṭhāmyahaṃ nityamihaiva na tavājñayā|| 33||
SP0100341: bhāgāndattvā tathānyebhyo ditsavo me dvijātayaḥ|
SP0100342: apaḥ spṛśanti śuddhyarthaṃ bhāgaṃ yacchanti me tataḥ|
SP0100343: dattvā spṛśanti bhūyaśca dharmasyaivābhivṛddhaye|| 34||
SP0100351: yathā hi devanirmālyaṃ śucayo dhārayantyuta|
SP0100352: aśuciṃ spraṣṭukāmāśca tyaktvāpaḥ saṃspṛśanti ca|| 35||
SP0100361: devānāmevamanyeṣāṃ ditsavo brāhmaṇarṣabhāḥ|
SP0100362: bhāgānapaḥ spṛśanti sma tatra kā paridevanā|| 36||
SP0100371: tvaṃ tu macchāpanirdagdho viparīto narādhamaḥ|
SP0100372: svasyāṃ sutāyāṃ mūḍhātmā putramutpādayiṣyasi|| 37||
SP0100380: sanatkumāra uvāca|
SP0100381: evaṃ sa bhagavāñchaptvā dakṣaṃ devo jagatpatiḥ|
SP0100382: virarāma mahātejā jagāma ca yathāgatam|| 38||
SP0100391: candradivākaravahnisamākṣaṃ candranibhānanapadmadalākṣam|
SP0100392: govṛṣavāhamameyaguṇaughaṃ satatamihenduvahaṃ praṇatāḥ smaḥ|| 39||
SP0100401: ya imaṃ dakṣaśāpāṅkaṃ devyāścaivāśarīratām|
SP0100402: śṛṇuyādvātha viprānvā śrāvayīta yatavrataḥ|
SP0100403: sarvapāpavinirmukto rudralokamavāpnuyāt|| 40||
SP0109999: iti skandapurāṇe daśamo 'dhyāyaḥ||