Skandapurāṇa Adhyāya 18

E-text generated on February 22, 2017 from the original TeX files of: Adriaensen, R., H.T. Bakker and H. Isaacson, eds. The Skandapurāṇa. Vol. I. Adhyāyas 1-25. Critically Edited with Prolegomena and English Synopsis. Groningen: Egbert Forsten, 1998.

SP0180010: sanatkumāra uvāca|
SP0180011: tataḥ sa rājā svaṃ rājyamutsṛjya saha bhāryayā|
SP0180012: vanaṃ viveśa tatrābhūtpuruṣādo mahābalaḥ|| 1||
SP0180021: so 'bhakṣayata tatrāgre śaktimeva mahāmunim|
SP0180022: tato bhrātṛśataṃ tasya vasiṣṭhasyaiva paśyataḥ|| 2||
SP0180031: tataḥ putravadhaṃ ghoraṃ dṛṣṭvā brahmasutaḥ prabhuḥ|
SP0180032: notsasarja tadā krodhaṃ vasiṣṭhaḥ kauśikaṃ prati|
SP0180033: putraśokena mahatā bhṛśamevānvakīryata|| 3||
SP0180041: sa baddhvā mahatīṃ kaṇṭhe śilāṃ brahmasutaḥ prabhuḥ|
SP0180042: nadyāmātmānamutsṛjya śatadhā sādravadbhayāt|
SP0180043: śatadrūriti tāṃ prāhurmunayaḥ saṃśitavratāḥ|| 4||
SP0180051: punaḥ pāśairdṛḍhairbaddhvā anyasyāmasṛjadvaśī|
SP0180052: tasyāṃ vipāśaḥ saṃvṛtto vipāśā sābhavattataḥ|| 5||
SP0180061: tato 'ṭavīṃ samāsādya nirāhāro jitendriyaḥ|
SP0180062: vāyubhakṣastadā tasthau svaṃ dehaṃ paritāpayan|| 6||
SP0180071: atha śuśrāva vedānāṃ dhvanimekasya susvaram|
SP0180072: adhīyānasya tatrāśu dhyānamevānvapadyata|| 7||
SP0180081: athainaṃ cārusarvāṅgī pīnonnatapayodharā|
SP0180082: upatasthe 'grataḥ patnī śakterdīnānanekṣaṇā|| 8||
SP0180091: tāmuvāca kutastvaṃ vai kasyaiṣa śrūyate dhvaniḥ|
SP0180092: sovāca dīnayā vācā rudatī śvaśuraṃ tadā|| 9||
SP0180100: adṛśyantyuvāca|
SP0180101: yadaiva sutaduḥkhena nirgato 'syāśramādguro|
SP0180102: tadāprabhṛtyevādṛśyā bhagavantamanuvratā|| 10||
SP0180111: adhīyānasya caivāyaṃ dhvaniḥ putrasya te vibho|
SP0180112: udarasthasya te sūnormā duḥkhe tvaṃ manaḥ kṛthāḥ|| 11||
SP0180120: sanatkumāra uvāca|
SP0180121: idānīmasti me vatse jīvitāśeti so 'bravīt|
SP0180122: kṣāntiṃ dhṛtiṃ ca saṃsthitya prayayāvāśramaṃ muniḥ|| 12||
SP0180131: tadāśramapadaṃ gacchanpathi rājānamaikṣata|
SP0180132: vasārudhiradigdhāṅgaṃ saudāsaṃ raktalocanam|| 13||
SP0180141: abhidravantaṃ vegena mantrairastambhayanmuniḥ|
SP0180142: tato 'sya nirgataḥ kāyādrakṣaḥ paramadāruṇaḥ|| 14||
SP0180151: uvāca cainaṃ duṣṭātmandaheyaṃ tvāṃ sabāndhavam|
SP0180152: dagdhena ca tvayā kiṃ me gaccha mukto 'si durmate|| 15||
SP0180161: tataḥ sa mukto dīnātmā rākṣasaḥ krūrakarmakṛt|
SP0180162: praṇamya śirasā bhīto jagāma kuśikāntikam|| 16||
SP0180171: gate niśācare rājā praṇamya śirasā munim|
SP0180172: prasādayāmāsa tadā sa covācedamarthavat|| 17||
SP0180181: na doṣastava rājendra rakṣasādhiṣṭhitasya vai|
SP0180182: kṛtāntena hatāḥ putrā nimittaṃ tatra rākṣasaḥ|| 18||
SP0180191: praśādhi rājyaṃ rājendra pitṛpaitāmahaṃ vibho|
SP0180192: brūhi kiṃ vā priyaṃ te 'dya karomi narapuṃgava|| 19||
SP0180200: rājovāca|
SP0180201: icchāmi bhagavanputraṃ tvayotpāditamacyuta|
SP0180202: devyāmasyāṃ mahāsattvaṃ tatkuruṣva mama priyam|| 20||
SP0180210: sanatkumāra uvāca|
SP0180211: evamastvityathoktvāsau tasyāṃ patnyāṃ mahāvrataḥ|
SP0180212: putraṃ ca śoṇakaṃ nāma janayāmāsa nirvṛtaḥ|| 21||
SP0180221: taṃ śoṇakaṃ tato rājye svaṃ putramabhiṣicya saḥ|
SP0180222: jagāma vanamevāśu sabhāryastapasi sthitaḥ|| 22||
SP0180231: vasiṣṭhasyāpi kālena śakteḥ putraḥ pratāpavān|
SP0180232: adṛśyantyāṃ samabhavatputro nāmnā parāśaraḥ|| 23||
SP0180241: vasiṣṭhaṃ tu tadā dhīmāṃstātamevābhyamanyata|
SP0180242: tāta tāteti ca muhurvyājahāra piturgurum|| 24||
SP0180251: tataḥ kadācidvijñāya bhakṣitaṃ rakṣasā śucim|
SP0180252: pitaraṃ tapasā mantrairīje rakṣaḥkratau tadā|| 25||
SP0180261: tatra koṭīḥ sa pañcāśadrakṣasāṃ krūrakarmaṇām|
SP0180262: juhāvāgnau mahātejāstato brahmābhyagāddrutam|| 26||
SP0180271: sutamabhyetya sampūjya vasiṣṭhasahitaḥ prabhuḥ|
SP0180272: ṛṣibhirdaivataiścaiva idamāha parāśaram|| 27||
SP0180280: brahmovāca|
SP0180281: †devatāste patanti sma yajñairmantrapuraskṛtaiḥ|
SP0180282: aṣṭamaṃ sthānametaddhi devānāmādyamīdṛśam†|| 28||
SP0180290: parāśara uvāca|
SP0180291: saha devairahaṃ sarvāṃl lokāndhakṣyāmi pāvakaiḥ|
SP0180292: dagdhvānyānprathayiṣyāmi tatra lokānna saṃśayaḥ|| 29||
SP0180300: sanatkumāra uvāca|
SP0180301: tasyaivaṃ garvitaṃ vākyaṃ śrutvā devaḥ pitāmahaḥ|
SP0180302: uvāca ślakṣṇayā vācā sāntvayaṃstamidaṃ vacaḥ|| 30||
SP0180310: pitāmaha uvāca|
SP0180311: kṛtametanna saṃdeho yathā brūṣe mahāmate|
SP0180312: kṣantavyaṃ sarvametattu asmatpriyacikīrṣayā|| 31||
SP0180321: yaiste pitā mahābhāga bhakṣitaḥ saha sodaraiḥ|
SP0180322: ta evāgnau ca hotavyā viśvāmitrasya paśyataḥ|
SP0180323: anyeṣāṃ svasti sarvatra devānāṃ saha rākṣasaiḥ|| 32||
SP0180331: †tasya saṃkalpasaṃtapto manyumūlamudāharat|
SP0180332: vasiṣṭhasya mahābhāga tvaṃ nivāraya putraka†|| 33||
SP0180341: devāḥ prāñjalayaḥ sarve praṇemuste mahāmunim|
SP0180342: ṛṣayaścaiva te sarve vāgbhistuṣṭuvire tadā|| 34||
SP0180351: tatasteṣāṃ mahātejā vacāṃsi pratyapūjayat|
SP0180352: viśvāmitrasya miṣata idaṃ provāca susvaram|| 35||
SP0180361: ya eṣāṃ brāhmaṇo vāpi kṣatriyo vā durātmavān|
SP0180362: rakṣasāṃ pakṣamāsthāya pratīkāraṃ kariṣyati|| 36||
SP0180371: tamapyatrāpi saṃkruddhastapoyogabalānvitaḥ|
SP0180372: vihatya tapaso yogāddhoṣye dīpte vibhāvasau|| 37||
SP0180380: sanatkumāra uvāca|
SP0180381: tato devāḥ sagandharvāḥ pitāmahapuraḥsarāḥ|
SP0180382: prabhāvaṃ tasya taṃ jñātvā parāśaramapūjayan|| 38||
SP0180391: huteṣu ca tatasteṣu rākṣaseṣu durātmasu|
SP0180392: saṃjahāra tataḥ sattraṃ brahmaṇo 'numate tadā|| 39||
SP0180400: sanatkumāra uvāca|
SP0180401: ya imaṃ śrāddhakāle vā daive karmaṇi vā dvijān|
SP0180402: śrāvayīta śucirbhūtvā na taṃ hiṃsanti rākṣasāḥ|| 40||
SP0180411: parāśarasyedamadīnasambhavaṃ viśuddhavākkarmavidhānasambhavam|
SP0180412: niśāmya vipraḥ kulasiddhisambhavaṃ na rākṣasaṃ gacchati yonisambhavam|| 41||
SP0189999: iti skandapurāṇe 'ṣṭādaśamo 'dhyāyaḥ||