Skandapurāṇa Adhyāya 42

E-text generated on February 22, 2017 from the original TeX files of: Bakker, Hans T., Peter C. Bisschop and Yuko Yokochi, eds. The Skandapurāṇa. Vol. IIB. Adhyāyas 31-52. The Vāhana and Naraka Cycles. Critical Edition with an Introduction & Annotated English Synopsis, in cooperation with Nina Mirnig and Judit Törzsök. Leiden/Boston: Brill, 2014.

SP0420010: suśarmovāca|
SP0420011: ataḥ paraṃ vaitaraṇīṃ nadīṃ pāpapraṇāśanīm|
SP0420012: śṛṇu me 'vahitaḥ putra pāpakarmabhayāvahām|| 1||
SP0420021: nadī vaitaraṇī putra ṭaṅkacchinnataṭāśubhā|
SP0420022: keśāsthirudhirāpūrṇā mahākṣārarasā tathā|| 2||
SP0420031: ullumpakairgardabhakairmakaraiḥ kacchapairapi|
SP0420032: śiśumāraiśca nakraiśca tantukai rākṣasairapi|
SP0420033: mahādaṃṣṭrairmahākāyaiḥ piśitāśaiḥ samākulā|| 3||
SP0420041: asipatraiśca tairvṛkṣaistīrajātaiḥ samāvṛtā|
SP0420042: śaivalena ca dīrgheṇa vitānenābhisaṃvṛtā|| 4||
SP0420051: tasyāstīre vanaṃ ghoraṃ śarabharkṣasamākulam|
SP0420052: vyāghradvīpisamākīrṇaṃ siṃhebhanarasaṃkulam|| 5||
SP0420061: tatra duṣkṛtakarmāṇastairvyāghrādibhirarditāḥ|
SP0420062: tāṃ nadīṃ sumahāghorāṃ pātyante duḥkhitāstataḥ|| 6||
SP0420071: tatra te patitā vatsa tantukaiḥ śaivalena ca|
SP0420072: vitānena ca saṃbaddhā bhakṣyante tairjhaṣādibhiḥ|
SP0420073: kṣārodakena dahyanto nādayantaśca duḥkhitāḥ|| 7||
SP0420081: varṣakoṭīrbhṛśaṃ tadvai †yāvatpāpasya saṃkṣayaḥ†|
SP0420082: tato muktāstūcchrayeṣu pātyante vai punaḥ punaḥ|| 8||
SP0420091: viśrāntāstatra te gatvā ucchrayānnarakaṃ punaḥ|
SP0420092: pātyante vivaśā mūḍhā yāvatpāpaṃ kṣayaṃ gatam|| 9||
SP0420101: uttīrṇaḥ socchrayānetānsaṃsāraṃ pratipadyate|
SP0420102: tīrṇo 'ntameṣu ca punarnarakeṣu pṛthakpṛthak|| 10||
SP0420111: koṭirekā tu kālasya vardhate hyuttarottaram|
SP0420112: ucchrayāṇāṃ tu sarveṣāmekaikasya pṛthakpṛthak|
SP0420113: sahasraṃ vardhate putra varṣāṇāṃ vai samāsataḥ|| 11||
SP0420121: ye tu gacchanti taṃ ghoraṃ narakaṃ duṣṭacetasaḥ|
SP0420122: śṛṇuṣva tānimānsamyagucyamānānmayānagha|| 12||
SP0420131: saritaṃ yo 'bhiśapate yaścaināmavamanyate|
SP0420132: yaśca nagnaḥ praviśati striyaṃ yaścātra gacchati|
SP0420133: niṣṭhīvedatha mūtraṃ vā purīṣaṃ vāpyathotsṛjet|| 13||
SP0420141: āpaśca harate yastu kṣetrārāmajanopagāḥ|
SP0420142: apāṃ setuharaścaiva taḍāgasya ca bhedakaḥ|| 14||
SP0420151: tathā puṣkariṇīnāṃ ca dūṣako yaśca mānavaḥ|
SP0420152: duṣṭāmaduṣṭāmathavā yaśca nārīṃ pradūṣayet|| 15||
SP0420161: padminīṃ yaśca harati nāśayedvāpi durmatiḥ|
SP0420162: pathistho vā gṛhe vāpi sārthānāṃ vā bhayaṃkaraḥ|
SP0420163: te sarve narakaṃ ghoraṃ prapadyante narādhamāḥ|| 16||
SP0420171: ya imāmaśubhapraṇāśanīṃ śṛṇuyānnityamaśuddhabādhanīm|
SP0420172: prayataḥ sa na yāti bhāvanīṃ saritaṃ vaitaraṇīmasaṅginīm|| 17||
SP0429999: skandapurāṇe dvācatvāriṃśo 'dhyāyaḥ||