Skandapurāṇa Adhyāya 59

E-text generated on February 22, 2017 from the original TeX files of: Yokochi, Yuko, ed. The Skandapurāṇa. Vol.III. Adhyāyas 34.1-61, 53-69. The Vindhyavāsinī Cycle. Critical Edition with an Introduction & Annotated English Synopsis. Leiden/Groningen: Brill & Egbert Forsten, 2013.

SP0590010: sanatkumāra uvāca|
SP0590011: tatastāṃ kauśikīṃ tatra prasthāpya himavatsutā|
SP0590012: vireme tapasastīvrātsasnau ca vidhivattadā|| 1||
SP0590021: vasānā vāsasī śukle divyasraganulepanā|
SP0590022: pārśvasthamatha saṃvīkṣya provāca varadāsmi te|| 2||
SP0590031: evamuktavatīṃ devīṃ śikharaṃ mūrtimattadā|
SP0590032: praṇipatya varaṃ vavre mayi sāṃnidhyamastu te|| 3||
SP0590041: nāma caiva mama khyātiṃ tava nāmnābhilakṣitam|
SP0590042: yātu lokeṣu sarveṣu tvatprasādānmaheśvari|| 4||
SP0590051: agniśca varadāṃ vavre mā gāḥ kopaṃ mayīśvari|
SP0590052: sadāpuṣpaphalatvaṃ ca vṛkṣāstāṃ tatra vavrire|| 5||
SP0590061: suprasannā bhavāsmākaṃ tvayi bhaktiśca no 'stviti|
SP0590062: tatastāṃ vavrire devīṃ sarvāśca paricārakāḥ|| 6||
SP0590071: upāsyamānā bahvībhirdevatābhirgirīndrajā|
SP0590072: abhibhūyānyatejāṃsi bhānavīva babhau prabhā|| 7||
SP0590081: hṛdaye 'pi sthitā patyuḥ patau hṛdayasaṃsthite|
SP0590082: sā vai girīndratanayā vimuktāsmītyamanyata|| 8||
SP0590091: atha sā tejasāṃ dhāma patiṃ sarvajagatpatim|
SP0590092: varadā varadaṃ draṣṭuṃ gamanāyopacakrame|| 9||
SP0590101: namaskṛtā tadvanadevatābhiḥ pradakṣiṇīkṛtya samiddhamagnim|
SP0590102: ṛṣīṃstato vandyatamābhivandya janaṃ ca teṣāṃ pratipūjya pūjyā|| 10||
SP0590111: utpapāta tato vyoma sā sārdhaṃ somanandinā|
SP0590112: siṃheneva jagaddhātrī gaṇaiḥ parijanena ca|| 11||
SP0590121: viyati jaladavṛndānvikṣipantī svadhāmnā 
SP0590122: himajalakaṇaśītairvījyamānā marudbhiḥ|
SP0590123: girivaratanayā sā patyureva smarantī 
SP0590124: madanadahanamūrterāśu pārśvaṃ jagāma|| 12||
SP0599999: skandapurāṇa ekonaṣaṣṭitamo 'dhyāyaḥ||