Skandapurāṇa Adhyāya 64

E-text generated on February 22, 2017 from the original TeX files of: Yokochi, Yuko, ed. The Skandapurāṇa. Vol.III. Adhyāyas 34.1-61, 53-69. The Vindhyavāsinī Cycle. Critical Edition with an Introduction & Annotated English Synopsis. Leiden/Groningen: Brill & Egbert Forsten, 2013.

SP0640010: sanatkumāra uvāca|
SP0640011: āhatya bherīḥ saṃnāhyā ditijā dānavāśca te|
SP0640012: tadā saṃnāhayāmāsū rathanāgaturaṃgamān|| 1||
SP0640021: gṛhītatoyānānīya daityā mattānmataṅgajān|
SP0640022: madasphātikarāndattvā dhūpāṃśca kavalāni ca|| 2||
SP0640031: baddhvā kakṣāśca saṃnāhyā graiveyāṃśca susaṃskṛtān|
SP0640032: aṅkuśānsarvalohāṃśca hemaratnapariṣkṛtān|
SP0640033: kareṇuṣu samārūḍhāḥ samantādgajasādinaḥ|| 3||
SP0640041: ābabandhurvicitrāṇi varmāṇi vidhivattadā|
SP0640042: tiryagūrdhvamukhānsamyagbabandhustomareṣudhīn|| 4||
SP0640051: āyudhāni ca sarvāṇi babandhurubhayorapi|
SP0640052: pārśvayorāsanānāṃ tu trayāṇāmapi bhāgaśaḥ|
SP0640053: vaijayantīpatākāśca samucchiśriyire tataḥ|| 5||
SP0640061: turaṃgānsnātapītāṃśca varmiṇo baddhavāladhīn|
SP0640062: ārūḍhā baddhanistriṃśā dānavā lohajālinaḥ|| 6||
SP0640071: ārūḍhā rathinaḥ kecidrathānyuktaturaṃgamān|
SP0640072: sāyudhānsapatākāṃśca prayastānsvakṣakūbarān|| 7||
SP0640081: atha sumbho nisumbhaśca bhrātarau dānaveśvarau|
SP0640082: āruhya baddhakavacau balonmattau mahāsurau|| 8||
SP0640091: saṃgrāmikau susaṃyattau rathau valgatturaṃgamau|
SP0640092: sāyudhau sapatākau ca kārtasvaramayau pṛthak|| 9||
SP0640101: nirjagmaturmahoraskau prayuktajayamaṅgalau|
SP0640102: māgadhairvandibhiḥ sūtaiḥ stūyamānau puraḥsaraiḥ|| 10||
SP0640111: tato yātuṃ samārabdhāstūryāṇyāhatya saṃghaśaḥ|
SP0640112: yatrāste kauśikī devī taṃ śailamabhito 'surāḥ|| 11||
SP0640121: atha dānavasiṃhānāṃ dhvajāḥ peturyiyāsatām|
SP0640122: aśivaṃ ca śivā nedurdīptāyāṃ diśi saṃsthitāḥ|| 12||
SP0640131: papāta nabhaso reṇuḥ kapotodaradhūsaraḥ|
SP0640132: upariṣṭācca senāyā babhramurgṛdhravāyasāḥ|| 13||
SP0640141: pratīpaṃ ca vavau teṣāṃ rajogarbhaḥ samīraṇaḥ|
SP0640142: rarāsa paruṣaṃ vyoma cacāla ca vasundharā|| 14||
SP0640151: parājayanimittāni budhyamānāḥ suradviṣaḥ|
SP0640152: abhijagmuḥ kṛtāntena kṛṣyamāṇā ivāvaśāḥ|| 15||
SP0640161: ādideśātha daityendro mūkamārakṣikaṃ tadā|
SP0640162: gṛhāṇa śulkamiti tāṃ brūhi gatvā sumadhyamām|| 16||
SP0640171: sa gatvā vacanāttasya praṇamyovāca kauśikīm|
SP0640172: śulkaṃ kila gṛhāṇārye dīyamānaṃ suradviṣā|| 17||
SP0640181: evamastviti sā procya taṃ visṛjya ca dānavam|
SP0640182: vyavardhata mahāyogā yogamāsthāya kauśikī|| 18||
SP0640191: atha tasyāḥ samutpedurgātrebhyaḥ pramadottamāḥ|
SP0640192: baddhagodhāṅgulitrāṇāḥ sāyudhā bhīmadarśanāḥ|| 19||
SP0640201: vāyasī vāyasāsyānāṃ strīṇāṃ koṭyā samāvṛtā|
SP0640202: upakā kauśikāsyābhistāvatībhirmahābalā|| 20||
SP0640211: pracaṇḍā siṃhavaktrābhirdevībhirabhisaṃvṛtā|
SP0640212: ugrā vyāghramukhābhiśca paritaḥ parirakṣitā|| 21||
SP0640221: jayā ca gajavaktrābhirjayantī ca mahābalā|
SP0640222: devībhiḥ śikhivaktrābhirameyābhirvṛtānaghā|| 22||
SP0640231: jayamānāśvavaktrābhirhaṃsāsyābhiḥ prabhā vṛtā|
SP0640232: prabhāvatī ca cakrāhvavadanābhirmahābalā|| 23||
SP0640241: śivā gomāyuvaktrābhiraśivā vidviṣāṃ raṇe|
SP0640242: saramā śvamukhībhiśca vṛtā paramadurjayā|| 24||
SP0640251: vijayā śyenavaktrābhiḥ sarvataḥ parirakṣitā|
SP0640252: kaṅkāsyābhirvṛtā mṛtyurhantrībhiḥ samare ripūn|| 25||
SP0640261: niyatirmadguvaktrābhirdurjayābhiḥ parairyudhi|
SP0640262: aśaniḥ kukkuṭāsyābhirbahvībhirabhipālitā|| 26||
SP0640271: revatī vṛṣadaṃśā ca pūtanā kaṭapūtanā|
SP0640272: ālambā kiṃnarī ṣaṣṭhī śakunirmukhamaṇḍikā|| 27||
SP0640281: alakṣmīradhṛtirlakṣmī potakī vānarī spṛhā|
SP0640282: etāścānyāśca kauśikyāḥ saṃbabhūvurmahābalāḥ|| 28||
SP0640291: nānāveṣadharābhiśca bahvībhiḥ parito vṛtāḥ|
SP0640292: bibhratībhirvicitrāṇi kavacānyāyudhāni ca|| 29||
SP0640301: sasarja kauśikī tūrṇaṃ haimānsāṃgrāmikānrathān|
SP0640302: yuktānaśvairmanovegaiḥ sāyudhānucchritadhvajān|| 30||
SP0640311: vājinaḥ sopakaraṇānmattonmattānmataṅgajān|
SP0640312: āyudhāni tanutrāṇi tūryāṇi vividhāni ca|| 31||
SP0640321: uvāca ca mahāyogā tā devīḥ purataḥ sthitāḥ|
SP0640322: devyaḥ sumbho nisumbhaśca bhrātarau devakaṇṭakau|| 32||
SP0640331: netuṃ māṃ kila saṃgrāme vijitya raṇamūrdhani|
SP0640332: āgatau tau balonmattau sahitau daityadānavaiḥ|| 33||
SP0640341: tāvahaṃ vinihaṃsyāmi śeṣānhata suradviṣaḥ|
SP0640342: ajarāścāmarāścaiva bhaviṣyatha mahābalāḥ|| 34||
SP0640351: iti tābhyo varaṃ dattvā samādiśya ca tāstadā|
SP0640352: devīrdevī mahāyogā yuddhāya kṛtaniścayā|| 35||
SP0640361: atha sā svarathaṃ mahārathā manasācintayadacyutā tadā|
SP0640362: tamupasthitamāśu cintitaṃ pradadau yaṃ girirājanandanā|| 36||
SP0640371: jvaladagnisamānavarcasaṃ parito ratnamayūkhamālinam|
SP0640372: purataḥ samavekṣya kauśikī sukṛtaṃ hemamayaṃ nabhaścaram|| 37||
SP0640381: vividhāyudhavarmasaṃyutaṃ pracalatpiṅgasaṭākalāpibhiḥ|
SP0640382: samare jayibhirdviṣadbalaṃ yuktaṃ kesaribhirmahābalaiḥ|| 38||
SP0640391: nṛtyanmayūreṇa vikīrṇabhāsā samucchritenātitarāṃ dṛḍhena|
SP0640392: haimena ratnadyutibhāsvareṇa dhvajapravekena virājamānam|| 39||
SP0640401: jagrāha vijayā chattraṃ siṃhī sūtā tadābhavat|
SP0640402: jayantī ca jayā cāsyā dadhatuścāmarāṇyatha|| 40||
SP0640411: tataḥ sā baddhakavacā vividhāyudhadhāriṇī|
SP0640412: āruroha rathaṃ divyaṃ kṛtāśīrjayamaṅgalā|| 41||
SP0640421: saṃpūrṇacandradyutinātha mūrdhni samucchritenātapavāraṇena|
SP0640422: saṃvījyamānā ca vicitradaṇḍaiḥ sucāmarairindumarīcigauraiḥ|| 42||
SP0640431: tatastāstūryamāhatya nedurnādānpṛthagvidhān|
SP0640432: devyā devyaḥ susaṃyattā babhūvuśca puraḥsarāḥ|| 43||
SP0640441: tena nādena daityānāṃ hṛdayāni cakampire|
SP0640442: visasarja śakṛnmūtraṃ hastyaśvaṃ cāsure bale|| 44||
SP0640451: cakampa iva bhūrlokaścukṣubhuḥ sāgarā iva|
SP0640452: viceluriva śailendrāḥ pusphoṭeva nabhastalam|| 45||
SP0640461: tadā taddevatānīkaṃ patākādhvajaśobhitam|
SP0640462: vireje vinadattūryaṃ śitanistriṃśasaṃkulam|| 46||
SP0640471: balākāpaṅktiśabalaṃ sendracāpaṃ mahāsvanam|
SP0640472: nabhasye māsi sataḍidvṛndaṃ jalamucāmiva|| 47||
SP0640481: tato jagāma saṃyattaṃ daityendrābhimukhaṃ tadā|
SP0640482: javena devatānīkaṃ saṃkṣipyeva diśo diśaḥ|| 48||
SP0640491: atha dadṛśuranīkamāgataṃ suraripavo vividhocchritadhvajam|
SP0640492: pratibhayajananaṃ mahāsvanaṃ pralaya ivāmbudavṛndamunnatam|| 49||
SP0649999: iti skandapurāṇe catuḥṣaṣṭo 'dhyāyaḥ||